Üçüncü Türkçülük Çalışmalarında (03.12.2024) keçmiş tariximiz və indiki tarixçiliyimizin ümumi məsələləri geniş müzakirə edilmişdir. Çalışmaların materialları artıq nəşriyyata göndərilmiş və yaxın həftələrdə toplunun çap olunması gözlənilir. Bu tədbirdə tarixdəki qəhrəmanlarımız və qurucu babalarımız mövzusunu növbəti çalışmaların əsas müzakirə mövzusu kimi müəyyənləşdirmişdik. Beləliklə, Dördüncü Türkçülük Çalışmalarının hazırlıq işləri başlamışdır.
Bu çərçivədə aşağıdakı əsas problemlərin müzakirəsi planlaşdırılır:
- Tarixdəki qəhrəman (və ya tarixi qəhrəman) kimdir, onun parametrləri necə müəyyən olunur?
- Antik dövr ortaq Türk tarixinin qəhrəmanları “bizimki” sayıla bilərmi?
- Sovet tarix elmində “milli qəhrəman” konseptinin mahiyyəti nədən ibarətdir?
- Milli tarix elmində “tarixdəki qəhrəmanlarımız” problemi və bu qəhrəmanların kriteriyaları hansılardır?
- Sovet və milli tarixçilikdə “qurucu babalarımız” anlayışının yeri və rolu nədən ibarətdir?
- Qurucu babalarımızın irsi və bu irsə sahib çıxma səviyyəmiz nə qədərdir?
- Ortaq Türk tarixinin ortaq qəhrəmanlar siyahısına kimlər daxil edilməlidir?
Türk tarix şüurunun bu mühüm problemləri barədə fikir yürütmək istəyən bütün tədqiqatçıları, akademikləri və mütəxəssisləri bu mühüm elmi diskussiyaya qoşulmağa dəvət edirik.
Dördüncü Türkçülük Çalışmaları Simpoziumunun tarixi və yeri haqqında əlavə məlumat tezliklə paylaşılacaqdır.
TDB Təşkilat Komitəsi
